بسم الله الرحمن الرحيم
اللهم صلِ وسلم على محمد
.
.
سبب كتابتي لتجربتي لاني بيوم كنت بمكانكم وادور على ابسط جواب لابسط تساؤولاتي .. كانت اسوأ اجازه مرت عليا بحياتي كلها كوابيس بالجامعه والتحضيري 😹
بأول مدونه ( هنا ) حتكلم عن ثلاث مواضيع :
- القبول التسجيل
- المواد وطريقة مذاكرتها
- اسئلة شائعه
....
....
بدايةً القبول والتسجيل :
التقديم يكون عن طريق موقع الجامعه بالوقت المحدد له والاولاد فقط يحتاجون لتأكيد القبول وبدون تعطي الجامعه اي اوراق لك يعني كل القبول حيكون الكتروني ولا راح تحتاج تعطيهم اي شيء ورقي ، فيه سؤال دائماً ينسأل :
- بعد القبول اول يوم اجيب معايا حاجه ؟
لا طبعاً بس اشعار القبول ينطبع من الموقع وخلاص
للناس اللي من برا القصيم راح اقولكم بعد تقديمكم بكم يوم راح تجيكم الرساله دي :
طبعاً لا تسوون مثلي وتحسون الدنيا تقفلت بوجهكم وخلاص تقلبوها مناحه 😂 ، الموضوع بسيط جيبوا اثبات سكن وقدموه وراح يطلع قبولكم بعد الطلاب اللي من المنطقه بفتره
( اي حاجه تخص اثبات السكن ممكن اجاوبكم عنها في حسابي بتويتر : @Mesokal )
افتكر وقت الناس انقبلت بهاشتاق #جامعة_القصيم كل البنات كاتبين اللي تخصصها كدا وبفرع كدا تكلمني خاص وانا بس اتفرج واستنى عمادة القبول تعبرني 🙂
لكن الحمدلله تلقيت دي الرساله وسويت مثلهم ولو متأخره عنهم شهر تقريباً xD
قبل تبدا الدراسه يمكن بشهر تجمعنا التحضيري وسوينا لنا قروب بالواتس وكنا من فروع مختلفه ومعانا بنات متخصصين بحيث كلمونا عن المواد ووو الله يجزاهم الف خير ❤️ ، فكرة قروب الواتس ابداً مش بطاله فادتني كثير
ثانياً : المواد وطريقة مذاكرتها
.
.
.
راح اتكلم ف دي المدونه عن السمستر الاول بس وبما اني درست مسار صحي راح اتكلم عنه بمدونه ثانيه ان شاءالله اما العلمي للاسف ماعندي اي خلفيه عنه 💜
في هدا السمستر عندكم 5 مواد :
- الانقلش :
• عليه 8 ساعات وغياباته 26
راح تدرسون كتب Unlock المستوى الاول والثاني ونص الثالث
المستوى الاول منها كتابين واحد Listening and Speaking
والثاني Reading and Writing
المستويين حيكونوا داخلين معاكم باختبار الميدترم لكن المستوى الثاني حيكون جزء منه بس بالميدترم ، حاولوا بالميدترم تجيبوا اعلى درجه ممكنه لانو وبكل صراحه راح يكون اسهل اختبار انقلش يمر عليكم بالتحضيري ! والكتابه حتكون فيه جداً سهله وبسيطه
بالفاينل راح تاخذو برضو كتب انلوك مستوى الثالث وراح تخبتروا بالجزئيه المتبقيه من المستوى الثاني مع المستوى الثالث ، هنا راح تكتبوا برقراف مو مثل الميدترم سهل وكدا لا هنا تكتبوه كامل بنفسكم ويعطونكم مساعدات طبعاً
( حنزل نماذج بتدوينه اخرى )
- الحاسب :
• عليه 4 ساعات وغياباته اتوقع 9
• بالانقلش
الحاسب عباره عن 4 كتب الجزء النظري راح يكون بالميدترم والتطبيق حيكون على جزئية الويندوز فقط ايضاً بالميدترم ، مانفسي اقولكم لا سهل ولا صعب ...
اما بالفاينل راح يكون اكثر شيء تطبيق وعلى الاكسل والبوربوينت وقواعد البيانات
- الاحصاء :
• ساعتين
• بالانقلش
ماده حلوه سهله مرا ولو انت فاشل بالرياضيات راح تنجح فيها بس انسى سلبيتك اتجاه الارقام لانو مختلف جداً عن الرياضيات بمستوى الصعوبه ، مثلاً انا برياضيات الثانوي كنت يالله امشي وبالاحصاء جبت فل مارك 🍃 ، المهم الميدترم حاول قد ماتقدر تجيب فيه فل مارك وبالفاينل كمان ماده مرا سهله وموجوده عشان ترفع معدلك 🌟
الاحصاء مافيلو كويزات لكن بدالهم واجب جداً مفيد وراح يفيدكم كثير لكن مشكلته لو ماحليت كل واجب بمحاضرته راح تتراكم عليك ويجي يوم التسليم مايمديك حتى تنقلهم نقل لانهم بصراحه مش قليل لكن حاولوا ماتنقلوا واجب الاحصاء من احد ثاني لانو مرا مرا مهم ويثبت لك المعلومات 💟
- الاخلاقيات :
• ساعتين
• بالعربي
راح تسمع كثير ناس تقولك اسألة الاخلاقيات معقده ووو ، انصحك تتجاهل كل دا الكلام وماتعطي نفسك طاقه سلبيه وبنفس الوقت لا تستهين بالماده واعطها حقها
🔴 افتكر اوقات الميدترم او الفاينل كانوا بالقروبات يرسلوا تجميعات لاسئلة الاخلاقيات وطبعاً اكثرها من حل الطلاب ومليانه اخطاء فانتبهوا !!!!
- الفيزياء :
• ساعتين
• بالانقلش
دي الماده حاولوا تشدون حيلكم فيها من البدايه ولاتسوون غلطتي انا اكره الفيزياء من زمان فلما شفتوا بالتحضيري ماعطيت نفسي مجال احاول اذاكره خلاص حاطه ف بالي انو صعب ومستحيل افهمه وبالميدترم جبت درجه جداً سيئه وبعدها صرت اذاكره اول بأول واهتم له ومانقصت بالنهائي فيه ولا درجه !
الكل كانوا يقولون بالميدترم كان اسهل وللامانه ندمانه اني ماعطيته فرصه من قبل ، فحاولوا قد ماتقدرون تتجردون من الطاقات السلبيه تجاه اي ماده لأنها فعلاً بتنعكس عليكم وعمركم ماراح تمشون فيها وانتم بتطلوا لها بسلبيه 🖤
- الأسئلة الشائعة :
- الأسئلة الشائعة :
.
.
.
- هل تدخل النسبة الموزونة بتخصيصي بعد التحضيري ؟
لا، فقط معدلك التراكمي من التحضيريه
- لو حملت ماده من المسار الاول مثلاً ما اتخصص ؟
اذا حملت غير الانقلش ( واتوقع الحاسب ) عادي يخصصونك صحي او علمي وتصير تدرسهم بالصيف او شيء
لكن لو الانقلش ماراح تخرج من المسار الأول
- طيب أحتاج خصوصيين ؟
ما أقدر اجاوب دا السؤال خاصةً لأنو ع حسب كل شخص و ع حسب الدكتور اللي قدامك برضو والضغط اللي بتمر فيه ممكن مايمديك تبحث وتبسط لنفسك ووو ف تحتاج لخصوصي ! عموماً الملخصات لا تعتمدون عليها بشكل أساسي وخلاص لازم لازم ترجعون للكتاب دائماً الملخصات تكون ناقصه ولا حاجه واصلاً الكتاب أضمن وابداً مو مشكله لو اخذت لك خصوصي
- لو اجلت ترم او اعتذرت عنه اقدر أتخصص صحي ؟
إيوا
- اقدر أحول بعد أول سمستر لفرع ثاني واكمل هناك واتخصص عندهم ؟
تقدر تاخذ زائر بس اما انك تحول بين فروع التحضيري مستحيل ، دي السنه حولنا بعد السمستر الاول واحنا نعرف انو مايصير اصلاً بس لقيناه مفتوح بالموقع ولما انقبلنا وخلاص فرحنا وكل شيء تم جاء العميد رجع كل واحد فينا لفرعه يقول بالغلط xDDDD
لازمك تدرس سنه من تخصصك بعد التحضيري بعدين تحول لفرع ثاني وتتخصص اي تخصص عندهم
- اقدر احول لتخصص غير التحضيري ؟
قبل تخلص اول سمستر من التحضيري اسئلهم لو تسوي اعتذار او تأجيل عشان تحول على تخصص ثاني وبناءً على موزونتك بالثانوي وقتها راح يحولونك
...
تحضيري سمستر اول كان ممتع وتحدي كبير بعد كلام الناس انو صعب وخاصةً إني ماراح اعديه وو ماعرف صراحه كيف تخطيت كلامهم وتحركت خطوه قدام كانت نعمه من ربنا اني تجاهلت كلام الناس وغريبه دايم انا بتأثر بالكلمه السلبيه لكن فعلاً الله كان معايا 💜 حاولوا ماتخسروا درجات بالسمستر الاول كون الضغط فيه اقل من السمستر الثاني وكمان حلو وبسيط ، انا اعرف دحين ببال اكثركم انو التحضيري مجرد سنه تعجيزيه لا اكثر ومحاوله لتخويف الطلاب وتحقيق انسحابهم كثير قالوها لنا ، لكن انا اقولها لكم استفدت من التحضيري كثير بشكل ماكنت متوقعته كانت المواد مكمله لبعض من مصطلحات وو ولا تعتذروا من اول شهر وتقولوا مانقدر كثير قالوا مثلكم لكن توكلوا على الله بغضون شهرين وهما متعودين على المصطلحات الجديده بحيث انها تكررت كثييير
وبكدا اتمنى أكون افدتكم ولو بالقليل وبالتوفيق ان شاءالله 💓
تعليقات
إرسال تعليق